КОЛЛЕДЖ ТУРАЛЫ ЖАЛПЫ МАҒЛҰМАТ

Маңғыстау облысы Жаңаөзен қаласы О.Тұрмағанбетұлы атындағы Маңғыстау индустриалды техникалық колледжi 37 жылдық тарихы бар облысымыздағы орта буын мамандарын дайындайтын, материалдық – техникалық базасы қамтылған, қазіргі заманға лайықты, көп бағдарлы оқу орындарының бірі.

Колледж өз қызметін 16 наурыз 1985 жылы Гурьев политехникалық техникумының филиалы негiзiнде бастаған.

Құрылған жылы оқу орнында оқыту күндізгі, сырттай және кешкі бөлімдерде үш мамандық бойынша жүргізілді:

1.0209-«Мұнай және газ скважиналарын бұрғылау»

2. 0210-« Мұнай және газ скважиналарын пайдалану»

3. 0303-«Кәсіпорындар мен өнеркәсіптің электр жабдықтары».

1986 жылғы 1 қыркүйекте техникумдағы білім алушылардың саны төмендегіні құрады:

күндізгі бөлімде -143 оқушы;

кешкі бөлімде -150 оқушы;

сырттай бөлімде -121 оқушы.

Техникум қиын жағдайларда құрылды. Техникум құрылған алғашқы жылдары сәйкесті материалдық-техникалық база құру қаржылық қиыншылықтарға байланысты болды. Әуелі физика және химия дәрісханалары мен зертханалары құрылып, безендірілді, арнаулы пәндер бойынша талапқа сай дәрісханалар мен зертханалар болған жоқ.

Техникум әкімшілігі мен педагогикалық ұжымының күш салуымен және шығармашылық потенциалының, «Өзенмұнайгаз» басқармасы, Бұрғылау жұмыстары басқармасы, Өзенэнергомұнай сияқты базалық кәсіпорындардың  қаржылық демеуінің арқасында оқу орнының материалдық-техникалық базасы бірте-бірте нығая бастады.

Нарықтық экономиканың қарқынды өсуіне және Маңғыстау облысында мұнай және газ өнеркәсібі дамуы деңгейінің кеңеюіне байланысты орташа буынның жас мамандарын даярлау қажеттігі пайда болды.

Сондықтан болашақ мамандардың оқу ақысын жартылай немесе толық төлеу бойынша кәсіпорындармен келісім-шарттарға отыру негізінде 1989-90 оқу жылында оқу орнында тағы 5 мамандық ашылды:

1. 2505-« Мұнай және газдың технологиясы»;

2. 1710-«Өндірістік кәсіпорындардың жабдықтарын техникалық күту және жөндеу»;

3. 1712-«Мұнай және химия өнеркәсібі кәсіпорындарының жабдықтарын техникалық күту және жөндеу»;

4. 2203-«Технологиялық үрдістер мен өндірісті автоматтандыру»;

5. 0102-«Кәсіпорындардағы бухгалтерлік есеп және бақылау».

Қазақстан Республикасы Президентінің 1991 жылғы тамыздың 31-iндегі қаулысы негізінде Жаңаөзен мұнай техникумы; кейіннен Қазақстан Республикасының Бiлiм министрлiгiнiң 11.12.1995 жылғы №132 бұйрығы бойынша Жаңаөзен мұнай және газ колледжi деп аталған.

1996-1997 оқу жылында колледж жанында 8 мамандық бойынша КТМ ашылды, оған Жаңаөзен мектептерінің 240 түлегі қабылданды. Оларды оқытуға қаржы қала әкімшілігінің арнайы шешімімен қаланың бюджет қорынан бөлінді.

ҚР Үкiметiнiң 21.04.1999 жылғы №441 қаулысымен Жаңаөзен мұнай және газ колледжiне Оразмағанбет Тұрмағанбетұлының есімі берiлген.

Колледж базасында кәсіптік білімнің мазмұнын одан әрі жетілдіру, оқу-тәрбие, өндірістік үрдісті әдістемелік қамтамасыз ету, орта кәсіптік білім беру оқу орындарының озық тәжірибесін оқып-зерттеу және тарату мақсатында ҚР Білім және ғылым министрлігінің 14.04.2000 жылғы №334 бұйрығы негізінде құрылған «Мұнай-газ ісі мамандықтары бойынша Республикалық оқу-әдістемелік бірлестік» жұмыс жасайды.

Сол жылдардан бері оқу орнының аты өзгерді, жаңа мүмкіндіктер мен жаңа міндеттер пайда болды.

Маңғыстау облысының білім басқармасы тарапынан колледж атауын Маңғыстау индустриалды – техникалық колледжі деп өзгерту туралы ұсыныс беріліп, Маңғыстау облысы әкімдігінің 05.06.2017 жылғы №140 қаулысына сәйкес мемлекеттік коммуналдық қазыналық кәсіпорын атауы О.Тұрмағанбетұлы атындағы Маңғыстау индустриалды техникалық колледжі деп өзгертілді.

Колледж бүгінде 14 мамандық бойынша: технологиялық жабдықтар мен құбырларды монтаждау, автомобиль көлігіне техникалық қызмет көрсету, жөндеу және пайдалану, менеджмент, токарь; электр және электромеханикалық жабдықтарды жөндеу және пайдалану; фермер шаруашылығы, технологиялық үрдістер мен өндірісті автоматтандыру; ақпараттық жүйелер үшін кәсіби мамандар дайындап келеді.

Колледжге бiлiктi ұстаз, Қазақстан Республикасының білім беру ісінің құрметті қызметкері, «Үздік педагог-2013» республикалық конкурсының жеңімпазы, «Мұнай-газ ісі» мамандықтары бойынша республикалық оқу-әдістемелік бірлестіктің төрағасы Ускимбаев Танат Максимович басшылық етеді.

Колледжді 2015-2022 оқу жылдары ішінде 3592 орта буын маманы бітіріп шықты. Колледж 34 мамандық бойынша лицензияға және 43 біліктілік бойынша лицензияның қосымшасына ие.

Колледж миссиясы: Жоғары деңгейлі теориялық және практикалық дағдылары, жоғары тұлғалық сапалары бар және Қазақстан Республикасының өндірістік потенциалы мен экономикасының деңгейін жаңа әлемде көтеруге және бәсекеге қабілетті орта буын мамандарын дайындау.